Plantun de Prouvènço

Pèr coumpara dos planto d'encò nostre

Lycopus europaeus & Ranunculus repens

Canebe-sóuvage

Lycopus europaeus

Lamiaceae Labiaceae

Autre noum : Lanço-dóu-Crist.

Noms en français : Lycope, Chanvre d'eau.

Descripcioun :
Lou canebe-sóuvage trachis en coulounìo dins li sagnas, li palun e àutri relarg mounte i'a d'aigo. Soun si fueio, penado e dentado, que dounon d'èr au canebe. Li flour, blanco o roso e picoutado de pourpre, soun mistoulino e en verticilo.

Usanço :
La lanço-dóu-Crist aurié d'ùni prouprieta astringènto e febrifujo. Caup d'acide litouspermique qu'ajudarié à lucha contro l'ipertirouidìo. Agirié peréu sus l'aisse gounadoutroupe (J.-M. Morel, op.cit p.475 e 486). En mescladisso emé d'àutri planto (valeriano, aubespin...) a peréu de prouprieta ancioulitico (Ibid, p. 457).

Port : Grando planto
Taio : 40 à 100 cm
Fueio : óupousado
Tipe bioulougico : Emicriptoufite
Cicle bioulougico : Planto renadivo

Gènre : Lycopus
Famiho : Lamiaceae
Famiho classico : Labiaceae

Ordre : Lamiales

Coulour de la flour : Blanco
Petalo : irreguliero
Ø (o loungour) flour : 2 à 4 mm
Flourido : Estiéu

Sòu : Ca
Autour basso e auto : 0
Aparado : Noun
Juliet à setèmbre

Liò : Sagnas - Ribiero - Palun - Prado umido
Estànci : Mesoumediterran à Mountagnard
Couroulougi : Bourealo
Ref. sc. : Lycopus europaeus L., 1753

Crèbo-biòu

Ranunculus repens

Ranunculaceae

Àutri noum : Auriflam, Gros-boutoun-d'or.

Nom en français : Renoncule rampante.

Descripcioun :
Lou crèbo-biòu, uno meno de gros-boutoun-d'or (Var) trachis dins li relarg umide, èi pèr acò qu'èi pas toujour, au nostre, uno planto coumuno. Se recounèis à si fiéu (estouloun) que podon faire fin qu'à 2 mètre de long e que s'enracinon (fotò). Li sepalo rèston contro li petalo e lou fru èi lisc.

Usanço :
Coume tóuti li ranouncle, es uno planto empouisounanto, tambèn pèr li bèsti (crèbo-biòu). Pamens un cop seco o couito, l'anemonino caupudo èi trasfourmado e pu toussico. Se dis qu'èro manjado cuecho di tèms de carestié.